HAMARA FUTURE
"Mujhe sirf aap se shaadi nahi karni, mujhe aap ke saath poori zindagi jeeni hai."
Woh Zindagi Jis Ke Hum Khwaab Dekhte Hain
Hamara Chota Sa Ghar 🏡
Hamara aik choota sa ghar ho jiss mein main hoon, aap hon aur aik sukoon ho. Jahan hum dono aik doosre ki izzat karein, aik doosre ko samjhein aur main aap se be-hadd pyaar karoon. Jahan ghar chota ho sakta hai, lekin hamari mohabbat bohat bari ho.
Subah Ki Chai ☕
Anam, meri Queen, aap so rahi hon aur main aap se 20 minute pehle uthoon. Aap ke liye chai banaoon, aap ko bachon ki tarah pyaar se uthaoon, aap ko hug karoon aur kiss karoon. Phir hum dono aik doosre ke saamne baith kar chai piyen aur Allah ka shukar ada karein ke Us ne humein aik doosre ke liye chuna.
Barsati Shaam 🌧️
Anam, barsaat ka mausam ho, baarish ho rahi ho aur hum dono saath baith kar chai pee rahe hon. Phir pata nahi kis pagalpan mein hum baarish mein bheegne chale jayein. Aasmaan ki taraf moonh karke aik lambi saans lein aur bas dil se kahein: Alhamdulillah, Allah ne humein yeh khoobsurat zindagi aur aik doosra diya.
Dunya Ghoomna ✈️
Hum dono duniya ghoomein ge, naye naye shehr dekhein ge, naye experiences karein ge aur har jagah Allah ka shukar ada karein ge. Lekin hamara pehla safar Hajj ka hoga, InshaAllah. Main chahta hoon ke meri zindagi ka sab se khoobsurat safar aap ke saath aur Allah ke ghar se shuru ho.
Bachon Ka Khayal 👶
Hamare bachay hon aur hum dono mil kar unka khayal rakhein. Unhein sirf duniya ki taleem nahi, balki deen ki taleem bhi dein. Main chahta hoon ke hum dono aik team ki tarah unki tarbiyat karein, aik doosre ka haath pakrein aur unhein mohabbat, adab aur Allah ke qareeb hona sikhayein.
Khuch Khuch Bewajah Larai 😂
Khuch khuch bewajah larai bhi hogi 😂, khuch meri ghalti hogi, khuch aap ki aur phir dono mein se koi aik maan bhi jayega. Thori si narazgi, bohat saara manana, hugs, sorry aur phir wahi pagalpan. Kyun ke main chahta hoon ke hamari zindagi perfect nahi, balki asli aur mohabbat se bhari ho.
Har Choti Khushi Ki Celebration 🎉
Aap ki choti si achievement bhi mere liye celebration hogi aur meri choti si khushi bhi aap ke liye. Main chahta hoon ke hum aik doosre ki har choti bari kamyabi par fakhar karein, aik doosre ko motivate karein aur har baar kaheinn: Alhamdulillah, hum ne saath mil kar kar dikhaya.
Late Night Conversations 🌙
Raat ka waqt ho, sab so rahe hon aur hum dono chup chaap baith kar baatein kar rahe hon. Kabhi apne dreams ke baare mein, kabhi apne future ke baare mein, kabhi deen ke baare mein aur kabhi bilkul bewajah ki baatein. Bas aap hon, main hoon aur woh sukoon ho jo mujhe sirf aap ke saath milta hai.
Saath Saath Behtar Hona 🌱
Main chahta hoon ke hum dono sirf aik doosre ke life partners na hon, balki aik doosre ke behtareen dost aur support system bhi hon. Aik doosre ko deen mein behtar banayein, aik doosre ke dreams ko support karein aur har din thora thora behtar insaan banne ki koshish karein.
Budhape Tak Saath 🤍
Aur phir aik din hum dono budhe ho jayein. Baal safed ho jayein, chehre par wrinkles aa jayein, lekin meri mohabbat aap ke liye waisi hi rahe. Main phir bhi aap ko apni Queen kahoon, aap ka haath pakroon aur dil se Allah ka shukar ada karoon ke meri poori zindagi mujhe aap ke saath mili. Aur phir InshaAllah, isi mohabbat ke saath Jannat mein bhi aik doosre ka saath mile.
"Mujhe nahi pata ke hamara future kaisa hoga..."
"Lekin mujhe yeh pata hai ke mujhe apne saath kaun chahiye."
AAP.
"Zindagi chahe jo bhi laaye, main har lamha aap ke saath jeena chahta hoon."
Hamari Universe Dekhein